مصر والبرازيل لقاء انتظرناه طويلاً

أخيراً وبعد طول انتظار هشوف منتخب مصر لكرة القدم بيقابل فريق البرازيل اللى فيه أفضل وأمهر وأغلى لاعبى كرة قدم على سطح الأرض ضمن مباريات كأس العالم للقارات ...






طبعاً لو أى حد سأل أى حد عن نتيجة المباراة اللى هيقول المنتخب هيشيل خمسة أجوان قابلين للزيادة واللى هيقول هما تلاتة أو أربعة ولو جبنا جون يبقي خير وبركة وكده نكون عملنا أحلى واجب مع البرازيل يعنى مش معقول نكون اتغلبنا 3 من الجزائر ونيجي نتغلب واحد من البرازيل يعنى برضه لازم نعمل للبرازيل هيبة ومكانة مش معقولة نساويه بالجزائر . عن نفسي اتمنى ان يؤدى المنتخب المصري مباراة بجد ويمكن يكسب زى ما الكاميرون عملتها فى كأس القارات 2003 وكسبت البرازيل حاملة لقب كأس العالم 2002 وقتها .... لكن طبعاً ده حلم بعيد المنال نظراً لعقلية اللاعب المصري اللى رايح للأداء المشرف وده أقصي ما عنده عند مواجهة عظماء كرة القدم , وكمان الفارق البدنى اللى هيخلى اللاعبين مش قادرة تشيل رجليها فى الشوط التانى

..



المتش ده مع البرازيل والجاى مع ايطاليا طبعاً متشين محسومين وان كنت اتمنى يتم تطبيق نظام الفورة فى كأس القارات السنة دى وتكون من أربعة " ولو تعادل فريقين 3-3 يلعب على شوز من واحد " وكمان كان نفسي يتم تطبيق نظام عدم تكافؤ الفرق لأننا هنشاهد فى متشين البرازيل وايطاليا لقاءات جانبية " زى سيد معوض ضد مايكون لاعب انتر ميلان أو دانى ألفيس لاعب برشلونة " , وكمان خط الوسط " شوقى ضد جلبرتو داسيلفا لاعب الارسنال " , والليلة الكبيرة خط الدفاع وحارس المرمى الشهير بالحضرى ضد " كاكا لاعب ريال مدريد و روبينهو لاعب مانشيستر سيتى وباتو لاعب الميلان وبابيستا لاعب روما " طبعاً نتيجة المواجهات الجانبية محسومة وقلب الملعب محسومة ... عن نفسي هقعد أعد المراوغات و التمريرات والكبارى والأنفاق اللى هتحصل .... و ربنا يستر .

مواجهات سابقة بين المنتخبين :

المباراة ستكون الأولى على المستوى الرسمي بين الفريقين حيث التقيا من قبل أربع مرات وديا وكانت منها ثلاث مباريات ودية في أسبوع واحد خلال جولة للفريق البرازيلي في مصر وانتهت جميعها بفوز البرازيل 5/صفر و3/1 و3/صفر وذلك في عام 1960 ثم التقى الفريقان وديا في مصر أيضا عام 1963 وفاز المنتخب البرازيلي 1/صفر.

من خيالى :

قلت ألعب PES 2009

بين منتخب مصر والبرازيل ولعبت بنفس خطة شحاتة 4-5-1 وبنفس تشكيلة لاعبى المباراة واتغلبت مصر 2-1 لكن كان أداء مشرف بصحيح وفعلاً حصل زى ما أنا متوقع ان اللاعبين هينهاروا بدنياً الشوط الثانى وهذا ما حدث لان مصر كانت متقدمة بهدف لكن نقول ايه بقى فى طبيعة اللاعب المصري حتى فى لعبة البرو العيب اللى فى اللعيب برضه هو هو

.


ربنا يستر .

.