اوووه زمالك .. اوووه زمالك
بهذا الهتاف أخذت جماهير نادى الزمالك تردده حتى الصباح فى المناطف المحيطة بنادى الزمالك " ميت عقبة - المهندسين - شارع أحمد عرابى - وشارع جامعة الدول العربية - وميدان سفنكس " ومناطق أخرى فى أنحاء البلاد , ابتهاجاً بفوز الزمالك على الأهلى بهدفين للا شئ . فى القمة 99 التى قرر الأهلى المشاركة فيها بغياب بعض اللاعبين لكنى أتسائل كم من الغائبين لعب الموسم بأكمله ؟الإجابة : عصام الحضرى و شادى محمد و محمد شوقى و عماد متعب و فلافيو فقط لاغير , أما أبوتريكة فكان فى اصابة وعائد من اجازة شهرين , وغيره بركات عائد من اصابة سنة ولسه ملعبش , وغيره نفس الحكاية مصاب واخد أكتر من شهر اجازة اخد اجازة من قبل.
نكمل ونقول منذ متى ظهرت نغمة البدلاء أليس الأهلى ثالث العالم ولديه أفضل لاعبي مصر - 30 لاعب - ولديه من المال لشراء كل موسم أفضل لاعبى الأندية المصرية , بجد تهريج ان يقال من فريق بطل انه يلعب بالبدلاء وكثي جداً يقال ان الأهلى له فريقان فريق داخل الخطوط وفريق خارج الخطوط .
ونمسك تشكيل الأهلى : " أمير عبد الحميد " لولا وجوده لكان الأهلى خسر ليس بأقل من 5 أهداف , و " محمد صديق " ده بقى كان بيلعب وقت اصابة عماد النحاس لمدة 3 شهور على الأقل , و " أحمد سيد و ووائل جمعة " لاعبين اساسيين ولعبوا تقريبا كل المباريات وهم من تلاعب بهم هجوم الزمالك ...... وفى خط الوسط " حسن مصطفى و أنيس بوجلبان و حسام عاشور " لاعبين أساسيين كان بيلعب معاهم بس محمد شوقى , وفى الطرفين " أحمد شديد قناوى " بيلعب أكتر من طارق السعيد , و" أحمد عادل" بيلعب أيضاً منذ فترة نظراً لغياب اسلام الشاطر , وفى الهجوم " أحمد بلال و أسامة حسنى " لاعبين متميزين لا يقلون كفاءة عن متعب وفلافيو ".
بعد كل هذا التفنيد , أين هم البدلاء , أين هم الشباب , أين فريق الأهلى الفذ الذى يملك بدلاً من لاعب اثنين ؟؟0
أحسن لاعبو الزمالك فى المباراة وتفننوا فى مهاراتهم واستعرضوا فى بعض الأحيان وكان فى امكانهم انهاء المباراة بعدد قياسي من
الأهداف فى الأهلى ولكن هذا حال الكرة المصرية .
تألق فى المباراة كل من : تامر عبد الحميد الذى رد على المشككين فى مستواه بعد الاصابة , وجمال حمزة بجانب محمد أبو العلا , وبالطبع شيكابالا ساحر كرة القدم المصرية القادم بسرعة الصاروخ , وباقى فريق الزمالك الذين لعبوا المباراة بروح غابت كثيراً عن الفريق .
بجد مستوى الزمالك الآن أفضل كثيراً عن الماضي , وسيستمر كذلك فى ارتفاع ان شاء الله , أما عن نغمة ان الأهلى لعب بالبدلاء فهى نغمة مرفوضة ومردود عليها كما سبق وأن شرحت أسباب ذلك .... بالفعل كان جمهور الزمالك فى حاجة للفوز لكى يفرح لأنه تحمل كثيراً فى كبوة الفريق و ان شاء الله تستمر الأفراح الزمالكاوية للأبد 0
7 comments:
اولا و قبل اى تعليق خالص اقولها للمرة التانية مبروك للزمالك و يا رب مستوى النادى يعلى كمان و كمان ....
بالنسبة بأة للبوست دا .... الذى لا استطيع ان ارى بنظرتى المتواضعة هدف من وراءه سوى التحامل على النادى الاهلى و تأكيد ان فوز الزمالك لم يكن بالفوز السهل او المنطقى ....و لا ارى انه يحمل سوى الاستهزاء الخفى بالنادى الاهلى ... اعيدها مرة اخرى استهزاء خفى .... من الممكن ان يكون لك يا عربى هدف اخر لم استطع رؤيته و احب كثيرا ان ترينى اياه ...
قبل ما اعلق بأة على الكلام نفسة ...احب اقول ان ثقافتى الكروية مش جامدة اوى يعنى ... بس نقدر نقول كويسة شغالة ... بعتبر نفسى بفهم فى الكورة الى حد ما ... بس بردو اكيد مش هوصل لدرجة انى اجادل ناس بتفهم اوى فى الكورة .... زى حضرتك كدا يا عربى ... بس اهو هقول رأيى و خلاص ...
انت بتقول ان الاهلى ملعبش ببدلاء و لا حاجة و ان دول لاعبين كانوا بيلعبوا بقالهم فترة كويسة .... بس السؤال ... هل نفس المجموعة دى كدا لعبت بنفس التشكيلة دى بدون الغائبين ؟؟؟؟ ...
انا عن نفسى مشفتش التشكيلة دى قبل كدا .... انت اتكلمت عن كل لاعب لوحده ... و انو لعب قبل كدا كتير ... و دى حاجة لا غبار عليها ... بس احنا مش بنلعب لعبة فردية ... مش كراتيه او سباحة ... احنا بنلعب بفريق ... فريق يعنى مش كل واحد لوحده ... فريق يعنى تشكيلة ... و التشكيلة دى كان ناقصها عناصر قوة كتيرة .... و لكن لا انكر اخطاء الدفاع القاتلة ... دفاع النادى الاهلى طبعا ....
كل دول لعبوا قبل كدا انما دى اول مرة يلعبوا مع بعض كفريق ... و هكرر كلمة قالها محلل رياضى ان فريق الاهلى كان غير متناغم ....
و انا شايفة ان الماتش كان تجربة فى صالح النادى الاهلى ... لأن زى ما انت قلت بالظبط ... ان النادى الاهلى عندو 30 لاعب من افضل لاعبى مصر .... بس عمرنا ما كنا هنعرف مستوى البدلاء او اللى مش بدلاء اوى ... غير لما نجربهم ... يعنى كان لازم النادى الاهلى يجرب تشكيلات بأة مختلفة عشان يقيمها .... الخطأ ان النادى الاهلى اختار المباراة الخطأ ... مباراة القمة ...
لو رجعنا لمباراة برشلونة مثلا ... نلاقى الشوط الاول برشلونة لعبت بفريق و الشوط التانى لعبوا بفريق مختلف تماما ... و الاتنين جامدين جدا .... نتمنى ان الاهلى يوصل للمرحلة دى فى يوم من الايام بس عمره ما هيوصلها غير لما يجرب ...
اما بالنسبة لأداء نادى الزمالك ... انا بصراحة مستمتعتش بالمباراة ... كانت بطيئة اوى .... الدورى كله مبارياته بطيئة و تشل بس المباراة دى كانت بطيئة بزيادة و مملة .... يمكن الزمالك لعب كويس بس مكنش باين انهم تعبوا اوى عشان النادى الاهلى كان مصاب بالكسح ... على فكرة انا كنت بفكر اكتب مقالة اضيفها لمقالاتى اللى محدش بيقراها غيرى بعنوان .. عندما يتجسد الكساح فى هيئة مباراة
بداية أحب أشكرك يا Hendعلى وجهة نظرك و على كتابتك المتميزة .
أما تعليقاً على ما كتبته فإن ردى سيكون بلا تحيز أو تعصب لفريق أحبه على حساب الآخر :
الصراحة أنا أرى ان الأهلى فريق كبير لا خلاف على ذلك , مثل الزمالك , وهما يمثلان قطبا الكرة المصرية اذا انهار احدهما لا نستمتع بأى دورى أو كأس أو حتى منتخب جيد والدليل على ذلك لو رجعنا الى موسم 2001/2002 الذى كان يتنافس عليه 3 أندية الاسماعيلى الأول البطل , وبعده الأهلى ثم الزمالك , وموسم 2002/2003 الذى فاز به الزمالك فى أخر مباراة بالموسم بفارق نقطة عن الأهلى . وكانت أحلى مباريات رأيتها فى الكرة المصرية خلال تلك الفترة .
نرجع لمباراة القمة فأنا لم اتحيز جداً للزمالك لكنى قلت شئ واقع وهو ان الأهلى لم يكن يلعب بالبدلاء كما قيل ويقال للتقليل من شأن فوز الزمالك . ... ولا أرى بدلاء سوى فى حراسة المرمى , وخط الهجوم ., وكمان أنا قلت ان معظم من حصلوا على الراحة من لاعبى الأهلى كانوا فى راحة أساساً بسبب اصاباتهم .
أنا معترض على أغلب المقالات التى قللت من شأن فوز الزمالك و أنه كان يلاعب بدلاء وليس لاعبى كرة أساساً , أنا عجبنى مقال فى الأهرام لحسن المستكاوى انه اعترض فيه على ما يحدث من تقليل لفوز الزمالك وأكد أن الأهلى كان سيخسر لو حتى كان لعب بالفريق الأساسي بالكامل دون أى غياب .
وأنا مع ذلك لأن الأهلى مستواه لم يكن جيداً خلال الفترة الأخيرة والدليل على ذلك مباراة بتروجيت فى الدورى والكأس .. وممكن نرجع فلاش باك للخلف ونرى أن الأهلى لعب مباراة الاسماعيلى الأولى فى الدورى فى استاد القاهرة بنجومه وكان لسه عائد من انجاز اليابان ومع ذلك خسر 3 / صفر مع الرأفة ممكن ترجعى لبوست كتبته وقتها بعنوان " هزيمة الأهلى فى كل مكان " كان فة شهر يناير , نرجع لكلامى ده قبل مباراته غداً مع الاسماعيلى فى نهاية الدورى بالاسماعيلية التى متوقع انها قد تكون سيرك ومهزلة على فريق الأهلى .
لذلك فمن تحليل بعض خبراء الكرة و أؤيدهم فى ذلك أن مانويل جوزيه كان يعلم قبل السفر أن مستوى الأهلى انخفض فى حين أن مستوى الاسماعيلى والزمالك فى ارتفاع ومنافسة للحصول على المركز التانى , وهذا معناه انهم لن يتركوا مباراة الأهلى وسيلعبوها بكل قوة فقرر السفر - عفواً الهروب من المواجهة - قبل المبارتين مع اراحة بعض اللاعبيين لوضع حجج أخرى للهزيمة بخلاف سفره .
ملحوظة هامة جداً:
الأهلى خلص الموسم الماضى من بدرى وقبل النهاية ب 4 أسابيع وكلها كانت مباريات غير هامة لم يكن من بينها الزمالك , فالسؤال لماذا لم يستريح العام الماضى مثل هذا العام ؟
اسف على الاطالة يا Hend واتمنى انى أكون عرفت أوضح وجهة نظرى .
شكرا على ردك السريع ... و شكرا على تقديم وجهة نظر جديدة ....
فاكرة اوى انا الموسم اللى الاهلى اتغلب من انبى فى اخر ماتش 1/ صفر و الزمالك خد الدورى .... كانت مأساة :) ...
و حسن المستكاوى زملكاوى ....
و لا تعليق على ان حدوتة البدلاء دى شبورة بتغطى انخفاض مستوى النادى ... لأنى مش عارفة ... الله أعلم ...
و احرجتنى اوى بصراحة يا عربى بأسف للأطالة دى .. علشان انا غالبا بكتب تعليقات طويلة و بكون غير أسفة لذلك :) ...
على فكرة يا هند
أنا أخدت مقال حسن المستكاوى كمثال فقط , ولكن فيه غيره أيده فى وجهة نظره .. وبالمناسبة المستكاوى ليس زملكاويا ً.
وده لينك لمقال يبرز ان حجة البدلاء حجة واهية وغير منطقية
http://sports.filbalad.com/Arabic/News.asp?NewsID=32865
انت مخدتش بالك من حاجة مهمة جدا يا عربى .... ان انا اصلا لقيت التعليق بتاعك دخل فى مرحلة بروفشنل اوى انا مش قدها اطلاقا مطلقا و مش هوصل لفهمى فى الكورة او اهتمامى بيها ان انا ارد عليك .... فرديت فقط على اللى ربنا قدرنى عليه :)) و الله انا رديت بس عشان عيب يعنى اسيبك تتكلم من غير ما ارد ... فاللى لفت نظرى فالموضوع كله ماتش الاهلى و انبى و حسن المستكاوى .... عشان انا طلعت من البيضة لقيت الناس فى بيتنا بيعتبروا ان حسن المستكاوى زملكاوى ... مش ازمة يعنى الراجل مش اسرائيلى بس اللى اعرفه عنه انو كدا ... بعد ما انت نفيت انو زملكاوى عملت سيرش على الموضوع و لقيت اراء متباينة على المنتديات ... ناس قالوا دا زملكاوى و ناس قالوا انو مش زملكاوى ... انما مش ازمة يعنى كل واحد حر ...
و بصراحة معنديش وقت اشوف المقال اللى على اللينك بس ان شاء الله هشوفها بعد الامتحانات ...
نأسف للأزعاج على كل حال
انا سعيد جداً بالمناظرة دى وان شاء الله تتكرر كذا مرة بعد كده .
واتمنى التوفيق لك فى الامتحانات .
Post a Comment