انطلقت بالأمس كأس الخليج خليجى 18 المقامة فى دولة الإمارات بإمارة أبو ظبى , الصراحة أنا معجب جداً بهذه الكأس التى تمثل ترابط دول الخليج فبعد مجلس التعاون الخليجى وفتح حدود دول الخليج فيما بينها وأصبح المرور بين حدودها - أسهل من مرور ميدان الجيزة لما يقفل - والتجارة أصبحت حرة بينهم وهم فى طريقهم لإصدار عملة موحدة لدول الخليج .
الفكرة ممتازة واللى عجبنى أكتر التنظيم الرائع للبطولة وكمان الملاعب اللى أحسن من ملاعب كأس الأمم الأفريقية اللى فاتت والتصوير المتميز اللى بيركز على الملعب - مش واحدة قاعدة فى المدرج زى تصوير ناس فى بلد تانية -أه لو نتعلم منهم كل ده , ومش عيب ومش غلط لأننا متعلمناش من تغطية الفريق الإعلامى الأسبانى اللى صور كأس أمم أفريقيا ورجعنا للكاميرا الواحدة فى تغطية الدورى المحلى , ويا رايح كتر من الفضايح .
لكن اللى نفسي فيه قوى إن يتعمل على غرار كأس الخليج كأس العرب بلاش يتعمل كل سنة نخليها كل سنتين عشان المشاغل وحجة ضغط جداول المباريات الوهمية , و أهى حاجة تجمع العرب حتى ولو كانت كورة بس يا ريت لو منختلفش فيها دى كمان .
ويا رب التوفيق لكل الفرق المشاركة بكأس الخليج , ومع تمنياتنا بنجاح فكرة كأس العرب , وسلامى لجامعة الدول العربية ووزراء الرياضة العرب .
No comments:
Post a Comment