فعلا انها ليلة هزيمة أندية الأهلى بجنسياته المختلفة بداية من الأهلى صيدا اللبنانى فى الدورى اللبنانى امام فريق الحكمة اللبنانى بنتيجة 3/5 , وهزيمة الأهلى السعودى أمام الزمالك المصرى صفر/1 , وأخيراً الهزيمة الثقيلة والمخففة للأهلى المصرى امام الإسماعيلى صفر/3 .
الصراحة انا مش هتكلم عن الدورى اللبنانى أو هزيمة الأهلى اللبنانى لأنها غير مؤثرة أو ليس لها صدى مثل المبارتين الاخرتين , لذلك هبدأ اتكلم عن عودة الزمالك لأجواء البطولة العربية بفوزه على الأهلى السعودى 1/صفر بهدف رائع جدا لمصطفى جعفر
الزمالك بدأ لفتح صفحة جديدة بعد تغيير جهازه الفنى وكان فوزه ضروريا و الصراحة انا شبه واثق ان البطولة العربية من نصيب الزمالك ان شاء الله , وهسيبكم مع بعض صور اللقاء:
ودلوقتى الكلام عن المباراة الرائعة أو السيرك الاسماعيلاوى فى استاد القاهرة الدولى وفوزه الكبير 3/صفر على النادى الأهلى "العالمى" تالت العالم , الصراحة باعتبارى زملكاوى انا كنت سعيد جدا بالفوز لانه هيعيد الدورى للملعب مع انه لسه لحد دلوقتى مع الأهلى واقعيا لكن ممكن نقول لسه الأمانى ممكنة لناديي الزمالك والاسماعيلى
الفوز ده كان ضرورى لكسر غرور جوزيه مدرب الأهلى اللى فاكر انه خلاص الفوز هو العادى باى تشكيل ومش مهم لانه على رأى أحد الجرائد بيطبق مبدأ " عك وابوتريكة يفك " تتفك بفاول ببلن بأى كورة تدخل الجون ويتحسب فوز , فغلط جوزيه فى التشكيل فكان لازم يغلط الأهلى , لكن برضه الإرهاق ليه دور لكن ده بيفرض نفسه ليه الأهلى العالمى معندوش احتياطى وبديل مناسب ؟!!! غريب أمر بعض الجماهير والصحافة الحمراء اللى بتنزع حق دراويش الإسماعيلى فى الفوز ونسيوا ان الحظ وقف بجانب الأهلى حتى فى هزيمته فأنقذه من هزيمة تاريخية لأبعد مدى زي الزمالك لما الحظ لم يسانده فى متش حرس الحدود الموسم الماضى فخسر صفر / 5 , بس الصراحة الحق يقال ان الإسماعيلى اثبت ان فيه شئ يا أندية الكورة المصرية اسمه الفوز على الأهلى وأهم حاجة انك تبادر بالهجوم عليه ليه الفرق دى تهاجم ضد اى فريق وتقف امام الأهلى فى منطقة جزائها وهوة ده سبب تخلف الكرة المصرية على عكس الدوريات الأوربية اللى فيها الفرق الصغيرة ممكن تغلب الكبيرة وده عادى فلو فيه نفس الثقافة الكروية دى هنا مش هنلاقى مشاكل فى التشجيع ولا جمهور يشمت فى جمهور لان فريقه خسر والكلام موجه لجميع الجماهير المصرية .
وختام كلامى ان مبروك للاسماعيلى وللزمالك , وجمهور الأهلى لازم يتعود ان فيه حاجة اسمها هزيمة وان لازم اقوم باعطاء الفريق المنافس حقه فى الفوز لانه اجاد وكسب حتى لو فزت والفريق المنافس اجاد اديله حقه .
واسيبكم مع بعض صور للقاء :
على فكرة هزيمة الأهلى البطل فكرتنى بمسرحية مدرسة المشاغبين لما سعيد صالح قال " مرسي الزناتى اتغلب يا رجالة " وده حال المفاجأة اللى ترتبت على فوز الاسماعيلى على الأهلى زعيم الدورى .
No comments:
Post a Comment