ياااااااااااااااه صدر حكم تانى من القضاء الادراى بعدم تحصيل رسوم للقمامة - يعنى الزبالة - على فواتير الكهربا بس المرة دى فى محافظة القاهرة , الحكم ده طلع فى عدد من المحافظات ولا أعلم لماذا لا يعمم على جميع أنحاء البلاد ؟ لكن تقريبا طبقاً للقانون لازم كل محافظة يطلع خكم ليها لوحدها . بس الأهم من ده كله إنه يتم تنفيذه ولا تتم المماطلة من الحكومة أو البحث عن ثغرة قانونية أخرى لكى تحلل رسوم النظافة-الزبالة - زى ما بيقولوا , والحكم اللى صدر الزم وزارة الكهربا برد الرسوم لاصحابها , ويارب ده يحصل. (ملحوظة : صدر حكم من قبل فى محافظة الجيزة بعدم جمع رسوم القمامة مع فواتير الكهربا إلا أنه صدر قرار أخر من المحافظ بتحصيل هذه الرسوم).
السؤال اللى بيجيي على ذهنى ليه ندفع رسوم نظافة وليه بتقدر جزافياً , طيب إذا كنا بندفع وفى الآخر مش بنلاقى نظافة على العكس الوضع يمكن أسوأ من الأول و الرائحة الكريهة بتشمها من على المحور كتير جدا سواء زبالة طبيعية أو دخانها بعد حرقها وتلويث الهواء ونرجع تانى لمشكلة تانية هية السحابة السودا ونقول سببها ايه ؟؟؟
الصراحة أنا شايف ان لازم يتم إلغاء هذه الرسوم وكفاية تحصيل فلوس من الشعب الغلبان مش ناقصة الأسعار نار والمصاريف بتغلى فى كل بيت , كمان رسوم نظافة وعلى ايه الكهربا , ليه عشان يتم جبر المواطنين على الدفع عشان النور ميتقطعش عن البيت لو متسددتش الرسوم .
يا رب نخلص من التخليص على مرتب المواطن اللى بيدبر بالعافية ونفكر صح , لأن فيه سؤال محيرنى مش فيه هيئة حكومية اسمها هيئة النظافة والتجميل طيب ليه نتعاقد مع شركة اجنبية لجمع القمامة ؟؟؟ ولا لازم تكون الكهربا ملوثة بالقمامة.
وعجبتنى بعض الكاريكاتيرات للرائع الفنان /مصطفى حسين حول هذا الموضوع .
ويارب يتكرر الحكم ده على جميع محافظات مصر لأن الحكاية مش ناقصة قرف. ولا هيبقى لازم تطبق الحكومة مبدأ "النظافة من الكهربا".
No comments:
Post a Comment