البلد دى مش أحسن من غيرها

" البلد دى أحسن من غيرها " الجملة دى سمعتها فى كذا مناسبة فى فيلم أو مسرحية أو من واحد من الناس , كنت بفكر فيها وأنا فى أيام الدراسة و أعقلها و أقول : " فعلاً البلد دى أحسن من غيرها " مفيش بلد تانية فيها ناس طيبة زى هنا , ولا فيها الشغل اللى الناس بتلاقيه – لم أواجه واقع الحياة بعد – وكنت بقول لسه الناس اللى عايزة تسافر تدور على شغل وتتبهدل ويطلع عينها عشان تجيب اى عمل تشتغله .

وحالياً أدركت ليه الناس وخصوصا الشباب يريد السفر والعمل خارج مصر لانى الآن أحس نفس الشعور بعدم الرغبة فى الحياة داخل مصر , أصبح كل شئ يثير أعصابي سواء التعليم أو السياسة أو الرياضة أو حتى الثقافة كل شئ لا يشجع الواحد انه يقعد يكمل حياته هنا من غير سفر .

لى يعض الأصدقاء سافروا للعمل بالخارج والحمدلله سعداء بعملهم وكمان يؤكدون على إن فيه يلاد كتير العمل والحياة فيها أحسن من مصر , وأنا من داخل الوطن أدركت هذا المعنى وأنا أرى البلد الجميلة التى كنت بحلم انها أعظم بلاد الأرض الآن تطرد شبابها بناة مستقبلها , وهناك العديد من العواقب الأخرى فى الطريق التى ستزيد من عدد الشباب الباحث عن العمل بالخارج , أو ترك البلد .

و بناءً عليه ونظراً لكثرة السلبيات عن الإيجابيات داخل وطنى مصر زى " التعليم والسياسة و العمل والمرور والإهمال فى جميع جوانب الحياة و الفساد وغير كل ده فيه سلبيات تانية كتير "
دلوقتى وفى لحظات يأسي بقول فعلاً " البلد دى مش أحسن من غيرها"ا